മുന്നറിയിപ്പ് കണ്ടു..ഒറ്റ വക്കിൽ പറഞ്ഞാൽ ഒരു നല്ല സിനിമ.വളരെ നാളുകൾക്കു ശേഷം ഒരു നല്ല സിനിമ കാണാൻ പറ്റി എന്നതിന് സംവിധായകനോടും തിരക്കഥകൃത്തിനോടും ആദ്യമേ നന്ദി പറയുന്നു.കഴിഞ്ഞ കുറച്ചു കാലങ്ങളായി കാമ്പില്ലാത്ത സിനിമയിൽ അഭിനയിച്ചു ജനങ്ങളുടെ ക്ഷമ പരീക്ഷിച്ചതിനു മമ്മൂട്ടിയുടെ ശക്തമായ പ്രായശ്ചിത്തം.
ഒരു ചെറിയ ലളിതമായ കഥ കൊണ്ട് പ്രേക്ഷകരെ എങ്ങിനെ പിടിച്ചിരുത്താൻ കഴിയും എന്ന് കാണിച്ചു തരുന്നുണ്ട് ഈ സിനിമ.ഓരോ ഫ്രെയ്മിലും സംവിധായകന്റെയും തിരക്കഥകൃത്തിന്റെയും കയ്യൊപ്പ് ചാർത്തിയിട്ടുണ്ട്. പശ്ചാത്തല സംഗീതമാണ് എടുത്തു പറയേണ്ട മറ്റൊരു മേഖല. സന്ദർഭത്തിനു ചേര്ന്ന സംഗീതം ഒരുക്കുന്നതിൽ ബിജിബാൽ 100% വിജയിച്ചു എന്ന് നിസ്സംശയം പറയാം. അഭിനേതാക്കൾ എല്ലാവരും തങ്ങളുടെ വേഷം മികച്ചതാക്കി.
പക്ഷെ എല്ലാത്തിലും ഉപരിയാണ് C K രാഘവൻ അഥവാ മമ്മൂട്ടി. മമ്മൂട്ടി എന്ന നടന്റെ പകർന്നാട്ടം അത്ഭുതത്തോടെയല്ലാതെ കണ്ടിരിക്കാൻ കഴിയില്ല. കഥാപാത്രത്തോട് അത്രയ്ക്ക് ഇഴുകിചെർന്നിട്ടുണ്ട്‌ അദ്ദേഹം. കഥാപാത്രത്തെ തന്നിലേക്ക് അവേശിക്കുന്നതിനു പകരം കഥാപാത്രത്തിന്റെ ഉള്ളിലേക്ക് കയറിച്ചെന്നു മമ്മൂട്ടി എന്ന വ്യക്തിയെ അല്ലെങ്കിൽ നടനെ മായ്ച്ചു കളയുന്നു, പകരം പ്രേക്ഷകന് കാണാൻ കഴിയുന്നത്‌ C K രാഘവൻ എന്ന കൊലയാളിയെ മാത്രം. ക്ലൈമാക്സ്‌ രംഗത്തിൽ അഞ്ജലിയെ നോക്കി ചിരിക്കുന്ന രാഘവന്റെ ചിരി മാത്രം മതി ഈ നടന്റെ അഭിനയപ്രതിഭ എത്രത്തോളമുണ്ടെന്ന് മനസ്സിലാക്കാൻ.പകർന്നാട്ടത്തിന്റെ (method acting) പൂർണ്ണത പ്രേക്ഷകന് ഇവിടെ ദർശിക്കാൻ കഴിയും.നന്ദി സംവിധായകൻ വേണുവിനും, തിരക്കഥാകൃത്ത്‌ ഉണ്ണിക്കും, പിന്നെ ഈ സിനിമ നിര്മ്മിക്കാൻ ചങ്കൂറ്റം കാണിച്ച സംവിധയകാൻ രഞ്ജിത്തിനും എല്ലാത്തിനും ഉപരി സിനിമ കഴിഞ്ഞിറങ്ങുന്ന പ്രേക്ഷക മനസ്സിൽ മായാതെ ഒരു നൊമ്പരമായി അല്ലെങ്കിൽ ഒരു ചോദ്യമായി നിറഞ്ഞു നില്ക്കുന്ന രാഘവനും...
