കൈയെത്തും ദൂരെ ഒരു കുട്ടിക്കാലം...
മഴവെള്ളം പോലെ ഒരു കുട്ടിക്കാലം...
മഴവെള്ളം പോലെ ഒരു കുട്ടിക്കാലം...
മഴവെള്ളം പോലെ പെയ്തൊലിച്ചു പോയ ബാല്യകാലത്തിന്റെ മാധുര്യമാർന്ന സ്മരണകളും നൊമ്പരങ്ങളും എന്നെ ഓർമ്മിപ്പിച്ചു കൊണ്ട് ഒരു ശിശുദിനം കൂടി കടന്നു പോയി..കളിച്ചും ചിരിച്ചും കരഞ്ഞും നടന്ന നാളുകൾ..എന്തൊരു സുഖമായിരുന്നു..!! എന്തൊരു രസമായിരുന്നു..!!!!.നിങ്ങൾക്ക് ഓർമ്മയുണ്ടോ കുസൃതികളും വികൃതികളും നിറഞ്ഞ ആ കുട്ടിക്കാലം? എങ്ങിനെ മറക്കും, അല്ലെ? എത്ര വളർന്നാലും ഈ ലോകം മുഴുവൻ കാൽക്കീഴിലാക്കിയാലും മങ്ങാതെ മായാതെ കിടപ്പുണ്ടാകും എല്ലാം, മനസ്സിന്റെ അടിത്തട്ടിലെവിടെയോ.ഒന്ന് പൊടി തട്ടിയെടുക്കുകയേ വേണ്ടൂ,നിറം പിടിച്ച ആ ഓർമ്മകൾ..പത്തരമാറ്റിന്റെ തിളക്കമുണ്ടാകും അതിന്....
ഒന്ന് കണ്ണടച്ച് കിടന്നാൽ ഓടിയെത്തും എല്ലാ ഓർമ്മകളും. ഒരു സിനിമയിലെ രംഗങ്ങളെ പോലെ, ഒന്നിന് പുറകെ ഒന്നായി..പല വർണ്ണത്തിൽ, പല ഭാവത്തിൽ..അവിടെ നാളെയെ പറ്റിയുള്ള ചിന്തയില്ല. ജോലിയെ പറ്റിയുള്ള ആശങ്കകൾ ഇല്ല..വീടിന്റെ ലോൺ, സ്കൂൾ ഫീസ് അങ്ങിനെ ഒന്നും ഇല്ല...പകരം കളിയും ചിരിയും കുശുമ്പും കണ്ണീരും കുസൃതിയും നിറഞ്ഞ, ഒരിക്കലും തിരിച്ചു കിട്ടാത്ത, എന്നാൽ തിരിച്ചു കിട്ടാൻ എല്ലാവരും ആഗ്രഹിക്കുന്ന ഒരുപാടു നല്ല നിമിഷങ്ങൾ മാത്രം ....
സ്നേഹം അന്യം നിന്ന് പോകുന്ന, എല്ലാം കച്ചവടവൽക്കരിക്കപ്പെടുന്ന ഈ കാലഘട്ടത്തിൽ മനസ്സ് കൊണ്ടെങ്കിലും ഒരു ശിശുവായി മാറാൻ നമുക്ക് കഴിയട്ടെ, കാലുഷ്യമില്ലാത്ത, കാപട്യമില്ലാത്ത ഒരു ശിശു...
