താലിബാൻ തീവ്രവാദികളുടെ പിടിയിലായ അഫ്‌ഗാനിസ്ഥാനിൽ നിന്നും വിമാനത്തിന്റെ അടിയിൽ ഒളിച്ചിരുന്ന് രക്ഷപ്പെടാൻ ശ്രമിക്കവേ വീണുമരിച്ച ഒരു ഹതഭാഗ്യന്റെ വാർത്ത കണ്ടപ്പോൾ തോന്നിയ വരികൾ. സുഹൃത്തായ രൂപയുടെ കുറിപ്പും ഈ ചിന്തയുടെ പിന്നിലുണ്ട്.
ഞാനാകെ ഭയത്തിലാണ്;
എന്റെ സ്വാതന്ത്ര്യം നഷ്ടപ്പെടാൻ പോകുന്നു,
അതിനുമുൻപ് ഞാനിവിടെ നിന്നും രക്ഷപ്പെടട്ടെ.
ഒളിക്കാൻ ഒരു സ്ഥലം പോലും കാണുന്നില്ലല്ലോ?
അതാ, അവിടെ ഒരിത്തിരി സ്ഥലം,
ഞാനവിടെ പോയി ഒളിക്കട്ടെ.
വേറൊരു നാട്ടിൽ സ്വാതന്ത്ര്യത്തോടെ ജീവിക്കാൻ
കഴിയുമോ എന്ന് നോക്കട്ടെ.
ഞാനിപ്പോൾ ഇവിടെ നിന്നും രക്ഷപ്പെടുകയാണ്,
ഈ പേടകം എന്നെയും കൊണ്ട് എങ്ങാണ്ടോ പോവുകയാണ്.
ഞാനിപ്പോൾ ഉയരങ്ങളിലാണ്,
എന്റെ പ്രതീക്ഷകളും!
നിങ്ങൾക്ക് കാണാൻ പറ്റാത്ത അത്രയും ഉയരത്തിൽ!
എനിക്ക് തണുത്തുവിറയ്ക്കുന്നു..
മരവിച്ച വിരലുകൾ നിവർത്താൻ കഴിയുന്നില്ല;
എനിക്കിവിടെ പിടിച്ചിരിക്കാൻ കഴിയുന്നില്ല;
ഞാനിതാ താഴോട്ട് പോകുന്നു!
പക്ഷികളെപ്പോലെ ഞാനും ഇപ്പോൾ പറക്കുകയാണ്.
അനന്തവിഹായസ്സിലൂടെ സ്വതന്ത്രനായി,
എല്ലാ ബന്ധനങ്ങളിൽ നിന്നും ഞാനിതാ
മോചിതനാകാൻ പോകുന്നു.
നിത്യസത്യത്തിലേക്ക് ഞാനിതാ പറന്നടുക്കുന്നു.
എന്റെ സ്വാതന്ത്ര്യം ഞാനിതാ നേടിയിരിക്കുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ