തിരക്കു പിടിച്ച ഈ ജീവിതത്തിനിടയില്‍ എപ്പോഴെങ്കിലും നിങ്ങള്‍ ഒന്ന് പിന്തിരിഞ്ഞു നോക്കിയിട്ടുണ്ടോ? നമ്മുടെ പഴയ കാലത്തിലേക്ക്‌..ഒന്നുമറിയാതെ എല്ലാം മറന്നു കളിച്ചു ചിരിച്ചു നടന്നിരുന്ന ആ നല്ല കുട്ടിക്കാലത്തിലേക്ക് ..?
ഇല്ലെങ്കില്‍ ഒന്ന് നോക്കണം …
നാം അറിയണം നമുക്ക് എന്തൊക്കെ നഷ്ടപ്പെട്ടു എന്ന് …
പ്രഭാതത്തിലെ തണുപ്പ് ഏറ്റു, മൂത്രശന്കയെ പിടിച്ചമര്‍ത്തി പുതപ്പിനുള്ളില്‍ ചുരുണ്ട് ഉറങ്ങിയ ആ ദിനങ്ങളെ ..?
ഒടുവില്‍ അച്ഛന്റെയോ അമ്മയുടെയോ നിര്‍ബന്ധബുദ്ധിക്കു വഴങ്ങി എഴുന്നേറ്റു കണ്ണും തിരുമ്മി മുറ്റത്തിറങ്ങി തെങ്ങിന്‍ ചോട്ടില്‍ കുത്തിയിരിക്കുമ്പോള്‍ കണ്മുന്നില്‍ തെളിയുന്ന കോടമഞ്ഞു ആസ്വദിച്ച് നിര്‍ന്നിമേഷനായി ഇരുന്നത് ?
വായില്‍ നിന്നും പുക വരുന്നത് കൊണ്ട് ബീഡി വലിച്ചു പുക വിടുന്നത് പോലെ രസിച്ചത് ?
പുല്‍നാമ്പുകളില്‍ പറ്റിപിടിച്ചിരിക്കുന്ന ജലകണങ്ങള്‍ സൂര്യരശ്മി ഏറ്റു തിളങ്ങുന്നത് ?
വായില്‍ ബ്രുഷും തിരുകി ഇളം വെയിലേറ്റു മുറ്റത്ത്‌ നടന്നത് ? കൊച്ചു വെളുപ്പാന്‍ കാലത്തേ തണുപ്പും ഇളം വെയിലും ചേര്‍ന്ന് സമ്മാനിച്ച അനുഭൂതി ആവോളം നുകര്‍ന്നത്‌..?
അമ്മ ദോശ ചുടുമ്പോള്‍ അടുപ്പിന്‍ തിണ്ണയില്‍ തീ കായാനിരിക്കുന്നത് ? അവിടെയിരുന്നു കൊണ്ട് തന്നെ, അമ്മയുടെ ശകാരം കേട്ട് കൊണ്ട് ചായ മൊത്തി കുടിച്ചത് ?
കിണറ്റില്‍ നിന്നും വെള്ളമെടുത്തു ദേഹത്തെക്കൊഴിക്കുമ്പോള്‍ ശരീരമാകെ തണുത്തു വിറച്ചത് ..? ചുണ്ടുകള്‍ വിരയാര്‍ന്നത്‌?
മനസ്സില്ലാമനസ്സോടെ സ്കൂള്‍ -ല്‍ പോയിരിക്കുന്നതും ക്ലാസ്സിലിരുന്നു ഉറക്കം തൂങ്ങിയതും ഒക്കെ മറവിയുടെ അഗാധതയിലേക്ക്‌ ഊളിയിട്ടു പോയോ ?
വൈകുന്നേരം കളിച്ചു രസിച്ചു വീട്ടിലേക്കു വന്നതും കാപ്പി കുടി കഴിഞ്ഞു വീണ്ടും കളിക്കാനായി അപ്പുറത്തെ പറമ്പിലേക്ക് ഓടിയത് ?
ഒടുവില്‍ അസ്തമന സൂര്യന്‍ ചെന്ചായത്തില്‍ കുളിച്ചു നില്‍ക്കുന്നത് കണ്കുളിര്‍ക്കെ നോക്കി കണ്ടത് ?
ഇരുട്ട് വീണു തുടങ്ങിയിട്ടും അമ്മയുടെ വിളിയെ മാനിക്കാതെ പിന്നെയും ഓടി ചാടി കളിച്ചത് ?
ചക്രവാള ശോഭ കണ്ടു ആര്‍ത്തുല്ലസിച്ചു കൊണ്ട് വീട്ടിലേക്കു മടങ്ങിയത് ?
കൈ -കാല്‍ കഴുകി ഉച്ചത്തില്‍ സന്ധ്യാനാമം ചൊല്ലിയത് ?
അങ്ങനെ അങ്ങനെ ഒരു പാട് ഒരു പാട് രസകരമായ, ആനന്ദകരമായ അനുഭവങ്ങള്‍ പറഞ്ഞാലും തീരില്ല അല്ലെ ? എന്താ ഒക്കെ മറവിയുടെ പെട്ടിയില്‍ അടുക്കി വെച്ചോ ഇത്ര വേഗം?
ഇന്നോ ..?
വൈകി എഴുന്നേറ്റു ജോലിക്ക് പോവുക , പാതിരാത്രിക്ക്‌ തിരിച്ചു വന്നു ടിവി -യുടെ മുന്പിലിരിക്കുക..ഒടുവില്‍ രാവിന്‍റെ ഏതോ അന്ത്യയാമത്തില്‍ കിടക്കാനായി പോവുക ..
ജീവിതത്തില്‍ ഒരു പാട് നേടിയെന്നു കരുതുമ്പോഴും നഷ്ടപ്പെട്ടതെന്താണെന്നു മനസ്സിലാക്കാന്‍ കഴിയുന്നില്ല പലര്‍ക്കും ..
എവിടെ പോയി നമ്മുടെ ആ നല്ല പ്രഭാതങ്ങളും സന്ധ്യകളും ..?
ചിന്തിച്ചിട്ടുണ്ടോ , എല്ലാം നേടി എന്നഹങ്കരിക്കുമ്പോഴും നമ്മള്‍ ഒരു പാട് നഷ്ടപ്പെടുത്തി എന്ന് ?
ആസ്വദിക്കുക ഇപ്പോഴത്തെ ജീവിതവും അതിനിടയില്‍ ഓര്‍ക്കുക നഷ്ടമാകുന്ന സായാഹ്നങ്ങളെ …
ശ്രമിക്കുക ഇനിയും നമ്മുടെ ജീവിതത്തില്‍ നല്ല സായാഹ്നങ്ങള്‍ ഉണ്ടാകാന്‍....
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ